Архив
16 март куни Ўзбекистонда содир бўлган энг муҳим хабарлар дайжести
Референдум ўтказишга 182,3 млрд сўм ажратилиши, нархи ошган помидор, вайнер Dili.me`га қўзғатилган жиноят иши, БМТ Инсон ҳуқуқлари бўйича олий комиссарининг Ўзбекистонга тавсиялари, Шавкат Мирзиёевнинг Венгрия бош вазири билан учрашуви ва бошқалар — «Газета.uz»нинг кун дайжестида.
Ўзбекистон Туркиянинг Ҳатай вилоятида уй-жой, мактаб ва инфратузилма объектлари қуриб беради — президент
Шавкат Мирзиёев Туркий давлатлар ташкилотининг навбатдан ташқари саммитида ташкилотнинг тизимли ҳамкорлик платформаси, шунингдек, Табиий офатлар мониторинги марказини яратишни таклиф қилди. Ўзбекистон Ҳатай вилоятининг Овакент туманини қайта тиклашга ҳам ёрдамлашади.
Марказий банк инфляция кўрсаткичи пасайишини прогноз қилди
Ўзбекистон Марказий банки маълум қилишича, йиллик инфляция кўрсаткичи пасайган, бу эса унинг иккинчи чоракда янада пасайиши эҳтимолини оширган. Аномал совуқ савдо ва саноатга салбий таъсир кўрсатди, лекин Марказий банк биринчи ярим йилликнинг охиригача соҳалардаги кўрсаткичлар тикланишини кутмоқда.
ИТБ Ўзбекистондаги қишлоқ жойларни ривожлантириш учун $200 млн ажратди
Ислом тараққиёт банки Ўзбекистондаги қишлоқ жойларни ривожлантириш учун 200 млн доллар ажратди. Лойиҳада 113 та қишлоқни ривожлантириш, йўл-транспорт инфратузилмаси, муҳандислик-коммуникация тармоқларини, электр таъминоти тизимини яхшилаш режалаштирилган.
Байрам кунларида Тошкентдаги жамоат транспорти ҳаракати тартиби маълум қилинди
Тошкент шаҳрида автобуслар 19, 20, 21, 22 март кунлари шанбалик, 25 март куни эса иш кунлари учун тасдиқланган жадваллар асосида ҳаракатланади.
Болани чет элда назоратсиз қолдириш эндиликда жиноят ҳисобланади
Ўзбекистон президенти болани хорижда назоратсиз қолдирганлик учун маъмурий ва жиноий жавобгарликни белгиловчи тузатишлар акс этган қонунни имзолади.
Шавкат Мирзиёев ва Виктор Орбан Туркияда учрашди
Ўзбекистон президенти Шавкат Мирзиёев ва Венгрия бош вазири Виктор Орбан тўғридан-тўғри авиақатновларни йўлга қўйиш ҳамда икки давлат корхоналари ўртасида ҳамкорлик қилиш учун ишлаб чиқариш майдонини ташкил этиш масалаларини муҳокама қилди.
Қорақалпоғистонда 123 млрд сўмга янги санаторий қурилади
Бўзатов туманида 200 ўринга мўлжалланган санаторийнинг қуриш ишлари бошланди. У Ўзбекистон касаба уюшмалари Федерацияси томонидан молиялаштирилган бўлиб, унинг баҳоси 123 млрд сўм. Олти қаватли иморат қурилганидан сўнг 120 та янги иш ўрни яратилади.
Ўзбекистонда энергия ресурслари ўғриликлари ҳақида хабар бериш учун Telegram-бот ишга туширилди
Бош прокуратура энергетика соҳасидаги қонунбузарликлар ҳақида хабар бериш мумкин бўлган Telegram-ботни ишга туширди.
Тошкент яқинидан тарихий кўза топилди
Тошкент шаҳри яқинидаги Тўқайтепа ёдгорлигидан баландлиги 80 см бўлган тарихий кўза яхши ҳолатда топилди. Илмий ходимлар топилманинг ясалган даврини аниқламоқда.
Вайнер Dili.me ва шериклари фуқарони калтаклагани айтилмоқда
Вайнер Dili.me ва унинг шериклари фуқарони уриб, жароҳат етказгани айтилмоқда. Бош прокуратура уларга нисбатан жиноят иши қўзғатилгани ва блогер 10 март куни ушланганини маълум қилди. Тергов ҳаракатлари олиб борилмоқда.
The Economist Россияга дўст давлатлар индексини тузди. Улар орасида Ўзбекистон ҳам бор
Ўзбекистон The Economist журналининг Россиянинг геосиёсий иттифоқдошлари индексига киритилиб, 12 давлат ичида охирги ўринда қайд этилди. Нашр рўйхатни тузишда мамлакатларнинг дипломатик, ҳарбий, шунингдек, энергетика ва иқтисодий алоқаларини таҳлил қилган.
Раҳматуллоҳ Сайфуддинов яна имомликка қайтди
Январь ойида ўз аризаси билан Тошкент шаҳри бош имом-хатиби вазифасидан озод этилган Раҳматуллоҳ Сайфуддинов «Минор» жоме масжиди имом-хатиби этиб тайинланди.
Референдумда 19−26 апрель кунлари муддатидан олдин овоз бериш мумкин
Конституциявий қонун лойиҳаси бўйича республика референдуми 30 апрель — якшанба куни ўтказилади. Муддатидан олдин овоз беришни истаганлар 19−26 апрель кунлари жараёнда қатнашишлари мумкин.
Референдум ўтказиш учун 182,3 млрд сўм ажратилди — МСК
Ўзбекистонда референдумга тайёргарлик кўриш ва уни ўтказиш учун 182 миллиард 386 миллион сўм ажратилди.
Марказий банк асосий ставкани 1 фоизга тушириб, 14 фоиз этиб белгилади
Марказий банк асосий ставкани 1 фоиз бандга пасайтириб, йиллик 14 фоиз даражада белгилаш тўғрисида қарор қабул қилди.
EastFruit портали — Ўзбекистонда помидор нархининг кескин ошиши сабаблари ҳақида
Ўзбекистонда иссиқхона помидорининг нархи кескин кўтарилди, бунинг сабаби сифатида январь ойидаги аномал совуқ пайтида иссиқхоналарда ҳосилнинг нобуд бўлгани кўрилмоқда. 10 мартга қадар қизил помидорнинг улгуржи нархи 27 минг сўмга, пушти ранглиси эса 33 минг сўмгача кўтарилган.
Бухородан Тошкентга олиб келинаётган 1 тонна истеъмолга яроқсиз гўшт аниқланди
Навоийда Тошкентга олиб келинаётган истеъмолга яроқсиз гўшт аниқланди. Маҳсулот қиш йўли билан йўқ қилинди.
Банкларда доллар курси бироз кўтарилди
Тижорат банклари 16 март куни аҳолидан 1 АҚШ долларини 11 365 — 11 440 сўмдан сотиб олмоқда, сотиш курси эса 11 460 — 11 505 сўм.
Сурхондарё вилояти ҳокимига ўринбосарлар тайинланди
Анвар Орипов Сурхондарё вилояти ҳокимига молия-иқтисодиёт ва камбағалликни қисқартириш масалалари бўйича биринчи ўринбосар, Фарҳоджон Исмоилов эса қишлоқ ва сув хўжалиги масалалари бўйича ўринбосар этиб тайинланди.
Энг кўп ўқилган хабарлар | Сўнгги янгиликлар
Қўшимча имкониятлардан фойдаланиш учун сайтда рўйхатдан ўтинг