Шавкат Мирзиёевнинг ШҲТ саммитида иштироки, Тошкент-Киев авиақатнови тикланиши, ШҲТ саммити раислиги расман Ўзбекистонга ўтиши — «Газета.uz»нинг 17 сентябрдаги энг муҳим хабарлари дайжестида.
Шавкат Мирзиёев ШҲТ саммитида Афғонистондаги гуманитар вазиятни ҳисобга олган ҳолда хориж банкларидаги афғон активларини қайтаришни таклиф қилди. Гап август ўртасида «Толибон» қўлига тушмаслиги учун АҚШ томонидан музлатилган Афғонистон Марказий банкининг миллиардлаб долларлари ҳақида кетмоқда.
Қашқадарёда маст фуқаролар ва ИИБ ходимлари ўртасида жанжал содир бўлди. Ҳолат юзасидан жиноят иши қўзғатилиб, икки фуқаро гумонланувчи тариқасида ушланган. Дастлабки тергов ҳаракатлари шаҳар прокуратураси томонидан олиб борилмоқда.
Август ойида Ўзбекистон автомобиль бозорида савдонинг сезиларли ўсиши кузатилди, деб хабар беради Иқтисодий тадқиқотлар ва ислоҳотлар маркази. Шу билан бирга, янги автомобилларни сотиш ҳажми пасайишда давом этмоқда ва ўсиш эски автомобилларнинг иккиламчи бозоридаги фаоллик сабаб таъминланмоқда.
Тошкент вилоятининг Ўртачирчиқ туманида Matiz ва Damas иштирокидаги аварияда 14 ёшли пиёда ҳалок бўлди. Марҳумнинг отаси ўғлини уриб юборган маст ҳайдовчи Миллий гвардия ходими эканини айтиб, видеомурожаат билан чиқди. Кейинроқ ушбу маълумот рад этилди.
18−19 сентябрь кунлари Бўстонлиқ туманида ўтказиладиган «SKY CAMP» марафони сабабли Чорвоққа олиб борувчи йўл вақтинча ёпилади.
Долларнинг сўмга нисбатан расмий курси 6,98 сўмга пасайиб, 10 674,08 сўм этиб белгиланди. Шунингдек, евро курс кўтарилди, рубль курси эса пасайди.
Пойтахтнинг Чилонзор туманида гиёҳванд моддалар айланмаси аниқланди, 5,2 кг гашиш ва қарийб 30 грамм «опий» мусодара қилинди.
Президент ҳузуридаги Хавфсизлик кенгаши масъул ходими Руслан Мирзаев ШҲТ Минтақавий аксилтеррор тузилмаси Ижроия қўмитаси директори лавозимига тасдиқланди.
2021−2022 йилларда ўтказиладиган Шанхай ҳамкорлик ташкилотининг саммитига раислик қилиш Ўзбекистонга расман ўтди. Саммит доирасида саноат кооперацияси дастурини қабул қилиш, камбағалликни камайтириш, туризм соҳасида ҳукуматлараро битимни ишлаб чиқиш, юқумли касалликларга қарши курашишни назарда тутувчи «Йўл харитаси»ни қабул қилиш каби вазифалар белгиланган.
«[Афғонистонда] ҳокимият тепасига янги кучлар келди. Бу юз берган факт», — деди Ўзбекистон президенти Шавкат Мирзиёев ШҲТ саммитида. У Афғонистонда гуманитар инқирознинг олдини олиш мақсадида чет эл банкларидаги афғон активларини музлатишни тўхтатишни таклиф этди. Шунингдек, давлат раҳбари ШҲТ-Афғонистон форматида олий даражадаги доимий учрашувлар ўтказишни таклиф қилди.
Президент Шавкат Мирзиёев Эрон президенти Иброҳим Раисий билан учрашувда унинг иқтисодий коррупцияга қарши курашдаги тажрибасидан фойдаланишини таъкидлади. Давлатлар раҳбарлари «Шимол-Жануб» коридорини Чорбохор порти билан фаоллаштириш масалаларини ҳам муҳокама қилишди.
Шанба ва якшанба кунлари мамлакатда илиқ об-ҳаво сақланиб туради. Ҳаво ҳарорати +32…+35 даражада бўлади. Шунингдек, кейинги ҳафтанинг бошида совуқ антициклон таъсири кучайиши кутилмоқда.
Тошкент шаҳар ИИББ Тошкент шаҳрида «Ҳизб ут-Таҳрир» террористик ташкилоти аъзолари сифатида гумон қилинган шахслар ушланиб, қамоққа олинганини маълум қилди. Ҳозирда тергов-суриштирув тадбирлари давом эттирилмоқда.
Статистика қўмитаси маълумотларига кўра, январь-август ойларида Ўзбекистон ташқи савдо айланмаси 25 млрд долларни ташкил этди. Ташқи савдода 6,4 млрд доллар миқдорида пассив баланс кузатилди.
Президент МДҲ иштирокчи-давлатлари аҳолиси бандлигига кўмаклашиш бўйича Битимни тасдиқлаш бўйича қарорни имзолади. Шартнома норасмий бандликни қисқартириш бўйича самарали ҳамкорликни амалга оширишга хизмат қилиши таъкидланди.
Жаҳон банки Doing Business ҳисоботини олдинги рейтинглардаги хатоликлар ва манипуляциялар сабабли бутунлай тўхтатди. 2018 йилда Ўзбекистон президенти мамлакатда тадбиркорлик учун шароитлар яратиш ва шу орқали 2022 йилда ушбу рейтингда энг яхши 20 та давлат қаторига кириш бўйича топшириқ берган эди.
16 сентябрь куни Ўзбекистонда 216 минг 245 доза коронавирусга қарши вакцина қўлланилди. Шу кунгача тўлиқ эмланган фуқаролар 3 млн 517 минг 178 нафарни ёки Ўзбекистон аҳолисининг 10,04 фоизини ташкил қилмоқда.
Кеча кун давомида Ўзбекистонда 624 кишида коронавирус инфекция қайд этилди. 4 нафар COVID-19 бемори вафот этди. Шунингдек, пайшанба куни 133 кишида пневмония қайд этилди, 1 нафар пневмония бемори вафот этди.
«Uzbekistan Airways» 26 сентябрдан Тошкент — Киев — Тошкент йўналиши бўйича авиақатновларни тикламоқда. Қатновлар 6 йилдан буён амалга оширилмаётган эди.
Қўшимча имкониятларга эга булиш учун сайтда рўйхатдан ўтинг