Jahon
Qirg‘izistonda un eksportiga vaqtinchalik taqiq joriy etildi
Qirg‘iziston hukumati “oziq-ovqat xavfsizligini ta’minlash” maqsadida olti oyga un va bug‘doy eksportini taqiqladi. So‘nggi haftalarda mamlakatda mahalliy bozorning 50 foizini egallagan Qozog‘iston uni narxi keskin oshdi.
Rossiyaning Qora dengiz floti shtab-kvartirasi raketa zarbasiga uchradi
Rossiya Qora dengiz flotining bosib olingan Sevastopoldagi shtab-kvartirasi raketa hujumiga uchradi. Binoning tomi va yuqori qavati vayron bo‘lgan. Rossiya Mudofaa vazirligi hujumda Ukrainani aybladi. Ukraina harbiylari esa ushbu ma’lumotni tasdiqladi.
Yerevanda 3 kundan buyon namoyishlar davom etmoqda, 80 dan ortiq odam hibsga olingan
Tog‘li Qorabog‘dagi vaziyat tufayli Yerevanda uch kundan beri ommaviy norozilik namoyishlari bo‘lib o‘tmoqda. Namoyishchilar Armaniston bosh vazirining iste’foga chiqishi va tan olinmagan respublikadan keluvchilar qabul qilinishini so‘ramoqda. Politsiya 80 dan ortiq namoyishchini hibsga olgan.
Bayden va Zelenskiy uchrashuvi: AQSh Ukrainaga 325 mln dollarlik yangi harbiy yordam paketini e’lon qildi
AQSh prezidenti Jo Bayden Oq uyda Ukraina rahbari Vladimir Zelenskiy bilan uchrashdi. Shundan keyin Qo‘shma Shtatlar yetakchisi Ukrainaga 325 mln dollarlik yangi harbiy yordam paketi ajratilishini e’lon qildi. Bayden buni “butun dunyodagi mustaqillik va hududiy yaxlitlik uchun kiritilgan sarmoya” deb atadi.
Qozog‘istonda Rossiyaning “xorijiy agentlar” reyestri muqobili paydo bo‘ldi
Qozog‘iston hukumati Rossiyaning “xorijiy agentlar” reyestri muqobili — xorijdan mablag‘ oluvchi shaxslar va tashkilotlar ro‘yxatini e’lon qildi. Unga jurnalistlar, OAV, huquqni himoya qiluvchi tashkilotlar va xorijiy kompaniyalarn vakolatxonalari kirdi. Reyestrdagilar uchun hech qanday cheklovlar qo‘yilmaydi.
Qirg‘izistonda barcha xorijiy filmlar qirg‘izcha subtitrlar bilan namoyish etiladi
Qirg‘iziston kinoteatrlarida namoyish etilayotgan barcha xorijiy filmlar 2024-yildan qirg‘izcha subtitrlar bilan namoyish etiladi. Bu chet el filmlarini qirg‘iz tiliga dublyaj qilish masalasidagi “birinchi qadam” bo‘lishi ta’kidlandi.
Turkiya Markaziy banki asosiy stavkani 30 foizgacha oshirdi
Turkiya Markaziy banki asosiy stavkani 500 bazis punktga — 30 foizgacha oshirdi. Bu regulyatorga yangi rahbar tayinlaganidan beri asosiy stavkaning to‘rtinchi marta oshirilishi hisoblanadi. Mamlakatda iyul-avgust oylarida inflyatsiya ko‘rsatkichlari kutilganidan yuqori bo‘lgan.
Eronda endi islomiy kiyinish qoidalarini buzgan ayollar 10 yilgacha qamalishi mumkin
Eron parlamenti “Hijob va iffat to‘g‘risida”gi qonunni ma’qulladi, unga ko‘ra ayollar islomiy kiyinish qoidalariga rioya qilmaganliklari uchun 10 yilgacha qamoq jazosiga hukm qilinishi mumkin. BMT ushbu qonunni “gender aparteidining bir shakli” deb atadi.
Nazarboyevning jiyani ustidan yanvardagi namoyishlar bo‘yicha jinoiy ish ochildi
Qozog‘iston Bosh prokuraturasi sobiq prezident Nazarboyevning jiyani, Milliy xavfsizlik qo‘mitasi rahbarining sobiq birinchi o‘rinbosari Samat Abishga nisbatan tergov boshladi. U 2022-yil yanvarida bo‘lib o‘tgan norozilik namoyishlari chog‘ida mansab vakolatini suiiste’mol qilganlikda gumonlanmoqda.
Qorabog‘da o‘t ochishni to‘xtatish bo‘yicha kelishuvga erishildi
Tan olinmagan Tog‘li Qorabog‘ respublikasi rasmiylari o‘t ochishni to‘xtatish bo‘yicha kelishuvga erishilganini ma’lum qildi. Unga ko‘ra, tan olinmagan respublika armiyasi qurolsizlantiriladi. Ozarbayjon vakillari bilan hududdagi armanlarning reintegratsiyasi yuzasidan muzokara o‘tkaziladi.
Ozarbayjon Qorabog‘da “aksilterror tadbirlari” boshlanganini e’lon qildi
Ozarbayjon “konstitutsiyaviy tuzumni tiklash uchun” Tog‘li Qorabog‘da “aksilterror tadbirlari” boshlaganini e’lon qildi. Tan olinmagan respublika poytaxti Stepanakert artilleriyadan o‘qqa tutilmoqda. Mudofaa vazirligi bayonotida fuqarolik obyektlari va tinch aholi nishonga olinmayotgani aytilgan.
Washington Post: 2050-yilga borib dunyo aholisining yarmidan ko‘pi anomal jazirama bilan to‘qnash keladi
2050-yilga borib 5 mlrd dan ortiq odam har yili kamida bir oy xavfli jazirama ta’siridan aziyat chekadi, deyiladi Washington Post va CarbonPlan tahlilida. O‘zbekistonda eng anomal issiq kunlar Termizda kuzatilishi kutilmoqda — 47 kun. Toshkentda bu muddat 7 kunni tashkil etadi.
Qozog‘iston 2,4 mln dan ortiq qatag‘on qurboni ma’lumotlarini maxfiylikdan chiqardi
Qozog‘istonda 1929−1956-yillardagi siyosiy qatag‘on qurbonlarining 2,4 milliondan ortiq arxiv kartochkalari maxfiylikdan chiqarildi. Surgun qilinganlar, maxsus ko‘chirilganlar va jinoiy javobgarlikka tortilgan 311 ming nafar shaxs reabilitatsiya qilindi.
Qirg‘iziston hukumati rahbari isitish mavsumidagi avariyalar uchun amaldorlar ishdan bo‘shatilishini ma’lum qildi
Qirg‘iziston Vazirlar Mahkamasi rahbari Akilbek Japarov isitish mavsumida yirik avariyalar ro‘y bergan taqdirda, amaldorlarni ishdan bo‘shatish bilan tahdid qildi. “Qish kutilmaganda keldi, deganingizni eshitmay. Qish mavsumiga tayyorgarlik 100 foiz bo‘lishi kerak”, — dedi u.
Elektrostansiyadagi yong‘in tufayli butun Nigeriya elektr ta’minotisiz qoldi
Nigeriyada butun mamlakat bo‘ylab 200 milliondan ortiq aholi elektrostansiyada yong‘in yuz berishi tufayli elektrsiz qoldi. Elektr tarqatuvchi kompaniya hodisani “tizimning butunlay ishdan chiqishi” deb atadi.
O‘zbekistonda tug‘ilgan rossiyalik ikki tadbirkor AQSh sanksiyalar ro‘yxatiga kiritildi
AQSh O‘zbekistonda tug‘ilgan ikki rossiyalik shaxs — milliarder Iskandar Maxmudov va tadbirkor Andrey Xoxlunni sanksiyalar ro‘yxatiga kiritdi. Ular haqida nimalar ma’lum?
WhatsApp kanallarni ishga tushirdi
WhatsApp messenjerda kanallar funksiyasi ishga tushirilganini e’lon qildi — ular Telegram kanallari tamoyili asosida ishlab chiqilgan. Funksiya hozirda 150 ta davlatda mavjud, biroq kompaniya yaqin oylarda barcha foydalanuvchilar kanal yaratish imkoniyatiga ega bo‘lishini va’da qilmoqda.
Yevroparlament Lukashenkoni Rossiyaning Ukrainadagi jinoyatlariga sherik deb tan oldi
Yevroparlament Belarus prezidenti Aleksandr Lukashenkoni Ukrainadagi jinoyatlari, xususan, ukrainalik bolalarni deportatsiya qilishda Rossiyaning sherigi deb tan oldi va Gaagadagi sudni uni hibsga olishga order berishga chaqirdi. Shunga o‘xshash hujjat avval Rossiya prezidentining hibsga olinishi uchun chiqarilgandi.
Qozog‘iston maktab va bog‘cha yo‘q hududlarda ko‘p qavatli uylar qurishni taqiqlamoqchi
Qozog‘iston deputatlari yaqin atrofida maktab, bolalar bog‘chasi yoki boshqa ijtimoiy infratuzilma bo‘lmasa, ko‘p qavatli uylar qurishni taqiqlashni taklif qilishdi. Qonun loyihasi bir qancha maktablarda bolalar soni ortib ketishi holatlaridan keyin ishlab chiqilgan.
“Rossiyaning barcha qarorlarini qo‘llab-quvvatlaymiz”. Kim Chen In Putin bilan uchrashdi
Rossiya prezidenti Vladimir Putin Amur viloyatidagi “Vostochniy” kosmodromida Kim Chen In bilan uchrashdi. Shimoliy Koreya yetakchisi Putin va Rossiya rasmiylarining qarorlarini doimo qo‘llab-quvvatlashini bildirdi.
Eng ko‘p o‘qilgan xabarlar | So‘nggi yangiliklar
- Qirg‘iziston va Tojikiston umumiy chegarani delimitatsiya qilish bo‘yicha kelishuvga erishdi
- Tramp tahdidlari fonida Kanadaning siyosiy kun tartibi o‘zgarib ketdi — Reuters
- Tramp Rossiya dezinformatsiyasi pufagida qolib ketdi — Zelenskiy
- Armaniston bosh vaziri yangi konstitutsiya bo‘yicha referendum o‘tkazishga chaqirdi
Qo‘shimcha imkoniyatlardan foydalanish uchun saytda ro‘yxatdan o‘ting