Arxiv
Nukus shahrida joylashgan bozor oldida fuqarolar yo‘lni to‘sib qo‘ydi
2 fevral kuni Nukus shahridagi markaziy dexqon bozor yonida fuqarolar bozor atrofidagi yo‘lni to‘sishgan. «Gazeta.uz» ning aniqlik kiritishicha, bunga «NUKUS DILISHA» kompaniyasiga qarashli binoda ijarada savdo qiluvchi fuqarolarning ijara narxi ko‘tarilganiga noroziligi sabab bo‘lgan.
Maktab o‘quvchilariga kamida bitta milliy cholg‘u asbobini chalish mahorati o‘rgatiladi
Prezident qarori bilan 2022/2023-o‘quv yilidan boshlab umumiy o‘rta ta’lim muassasalarida o‘quvchilarga milliy musiqa cholg‘ularidan kamida bittasini chala olish mahorati o‘rgatiladi va bu ularning shahodatnomasida qayd etiladi. 10130 ta maktab, 323 ta bolalar musiqa maktabi, 826 ta madaniyat markazi 7 turdagi milliy cholg‘ular bilan 3 to‘plamdan ta’minlanadi. Buning uchun 205 mlrd so‘m ajratiladi.
OTMlarda o‘qish 24 fevralgacha bosqichma-bosqich ana’naviy shaklga o‘tkaziladi
Oliy ta’lim muassasalarida o‘quv jarayonlari 7 fevraldan 24 fevralga qadar bosqichma-bosqich ana’naviy shaklga o‘tkaziladi. Bu davr ichida darslar ham onlayn ham oflayn shaklda olib boriladi. OTMlar imkoniyatidan kelib chiqib, alohida reja-grafik asosida oflayn shaklga o‘tadi, bu haqda ular o‘zining rasmiy sayti orqali xabar beradi.
Samarqandga uchayotgan samolyot Qozog‘istonda shoshilinch qo‘nishni amalga oshirdi
Sankt-Peterburgdan Samarqandga qarab uchayotgan «Aeroflot» aviakompaniyasiga tegishli samolyot Qozog‘istonda shoshilinch qo‘nishga majbur bo‘ldi. Bunga reys o‘lovchilaridan biri — O‘zbekiston fuqarosiga shoshilinch tibbiy yordam talab etilgani sabab bo‘lgan.
Foto: Haydovchilik guvohnomasini olish uchun Yagona imtihon markazi ishga tushdi
Haydovchilik guvohnomasi uchun imtihon topshirishga mo‘ljallangan Yagona imtihon markazi o‘z faoliyatini boshladi. Markazga kelgan nomzod nazariy savollarga to‘g‘ri javob berishi va so‘ngra imtihonning amaliy qismidan o‘tishi kerak bo‘ladi. Shundagina u YHXBB yoki davlat xizmatlari markazlaridan haydovchilik guvohnomasi berilishiga asos bo‘ladigan maxsus sertifikatni qo‘lga kiritadi (foto).
Senatorlar geografik ko‘rsatkichlar to‘g‘risidagi qonunni ma’qulladi
Senatning navbatdagi yalpi majlisida «Geografik ko‘rsatkichlar to‘g‘risida» gi qonun ko‘rib chiqildi. Unga ko‘ra, endi tadbirkorlar o‘z tovarlarida ishlab chiqarilgan joy nomini ko‘rsatishi kerak. Qayd etilishicha, hozirgacha O‘zbekistonda faqat 4 ta tovar, xususan, 2 ta mahalliy mahsulotning geografik ko‘rsatkichi ro‘yxatdan o‘tkazilgan. Senatorlar ishontirishicha, mazkur qonun mintaqaviy brendlar rivojlanishi va hududlarning turistik jozibadorligi oshishiga xizmat qiladi.
OTB O‘zbekistonda 2025 yilgacha umumiy qiymati $2,8 milliardlik 27 ta loyihani amalga oshiradi
OTB 2022−2024 yillarda O‘zbekistonda umumiy qiymati 2,8 mlrd dollarga teng 27 ta loyihani amalga oshirishi ko‘zda tutilmoqda. Joriy yilda OTB O‘zbekistonga qayta tiklanadigan energiya manbalari, jumladan, quyosh va shamol energiyasi, suv resurslari, shaharsozlik va yo‘llarga investitsiyalar sohalarida yordam ko‘rsatish, ipoteka bozorini rivojlantirishni davom ettirishni rejalashtirmoqda.
Umra-2022: Ilk ziyoratchilar O‘zbekistonga qaytib keldi
1- fevral kuni “Umra — 2022” mavsumining ilk ziyoratchilari Saudiya Arabistonidan O‘zbekistonga qaytib keldi. Ular “Baqi” qabristoni, “Qubo” va “Qiblatayn” masjidlari va Uxud tog‘ida, shuningdek, Madina shahrida Masjidul Nabaviyda, Payg‘ambarning Ravzai mutohharalarida ziyoratda bo‘lgan.
Oliy ta’lim vaziri Qashqadaryoda 3 ming talaba Telegram orqali o‘qitilayotganini tanqid qildi
Oliy va o‘rta maxsus ta’lim vaziri Abduqodir Toshqulov masofaviy ta’lim uchun ko‘plab maxsus platformalar bo‘lishiga qaramasdan, Qashqadaryo OTMlaridagi talabalar Telegram orqali o‘qitilayotganini tanqid qildi. Masofaviy ta’limni tashkil qilishdagi kamchiliklar uchun Qarshi davlat universitetining Pedagogika instituti rahbarlariga hayfsan e’lon qilindi.
Arzon kvartira haqida e’lon berib, fuqaroning pulini o‘zlashtirganlikda gumonlanuvchi shaxs qo‘lga olindi
IIV Kiberxavfsizlik markazi xodimlari ijtimoiy tarmoqlar va olx.uz saytida kvartirani ijaraga beraman deb, fuqaroning pulini o‘zlashtirganlikda gumonlanayotgan shaxsni qo‘lga oldi. U kvartira uchun avans tariqasida berilgan 500 ming so‘mni o‘zlashtirganligi aytilmoqda.
«Senatorlar qo‘mita majlisi yoki qaysidir tadbirda ishtirok etish bilan cheklanib qolmoqda» — Senat raisi
Senat raisi Tanzila Narbayeva yalpi majlis vaqtida senatorlar faoliyatidagi tadbirbozlikni tanqid qildi. «Senatorlar faqatgina qo‘mita majlisi yoki qaysidir tadbirda ishtirok etish bilan cheklanib qolmoqda» — dedi u. Qolaversa, qo‘mitalar yetarlicha ishlamayotgani, ular faqat rahbarlarning axborotini tinglash bilan shug‘ullanayotgani ta’kidlandi.
«IMEI kerak emas» degan gaplar ortida noqonuniy bozordan «dolya» olib turganlarning lobbisi turibdi — Sherzod Shermatov
AKT vaziri Sherzod Shermatov UzIMEI yashirin iqtisodiyotga qarshi kurashish uchun kerakligini ta’kidladi. «IMEI kerak emas, IMEI`ni yo‘q qilinglar, degan gaplar tagida noqonuniy bozordan „dolya“ olib, foyda qilib turganlarning lobbisi turibdi», — dedi vazir Kun.uz nashriga bergan intervyusida. Shermatov UzIMEI pulli ekanligiga to‘xtalib, uning soliq ekanligini qayd etgan.
1 martdan «Yashil yillik» umummilliy tadbiri boshlanadi
Prezident 1 martdan «Yashil yillik» umummilliy tadbiri boshlanishini ma’lum qildi. Joriy yil bahor mavsumida «Yashil makon» loyihasi doirasida 125 mln dona daraxt ko‘chatlarini ekish rejalashtirilmoqda. Aholiga kamida 10 mln dona mevali va manzarali daraxt ko‘chatlari bepul tarqatiladi. «Agar O‘zbekistonda ekologiyani yaxshilayman desa, har yili har bir xonadon ikkitadan daraxt eksin. Har bir tashkilot beshtadan daraxt eksin, qaysi tashkilot bo‘lishidan qat’i nazar», — dedi prezident.
Buxoroda qurilish korxonasidan pulini ololmagan erkak o‘zini yoqib yubordi
Peshko‘lik fuqaro uy olish maqsadida mart oyida qurilish korxonasi quruvchisiga 150 mln so‘m pul bergan. Quruvchi uyni rasmiylashtirib bermagani uchun fuqaro pulini qaytarishni so‘ragan. Pulini ololmagan erkak o‘zini-o‘zi yoqib yuborgan, natijada tanasining yarmi kuygan. Holat yuzasidan jinoyat ishi qo‘zg‘atilgan.
Finlyandiya O‘zgidromet salohiyatini oshirish uchun 2 mln yevro grant ajratadi
Finlyandiya hukumati O‘zgidromet salohiyatini modernizatsiya qilishga yo‘naltirilgan loyihaga 2 mln yevro grant ajratishni ma’qulladi. 3 yillik loyiha tabiiy ofatlarni prognoz qilish va iqlim o‘zgarishiga moslashishni rag‘batlantirishni nazarda tutadi.
Samarqandda fermer 1 gektar yerni 20 ming dollarga sotishga uringani aytilmoqda
Samarqand tumanida fermer o‘ziga qarashli xo‘jalikning sug‘oriladigan yeridan 1 gektarini fuqaroga issiqxona qurish uchun sotish va hujjatlarni tayyorlab berishni kelishib olgani aytilmoqda. Buning evaziga u 20 ming dollar olgan vaqtida ushlangan. Unga nisbatan jinoyat ishi ochildi.
Erkinjon Turdimov tanqidiy material yozadigan jurnalist va blogerlarni mukofotlashni taklif etdi
Samarqand viloyati hokimi tanqidiy material yozuvchi jurnalist va blogerlarni moddiy rag‘batlantirishini ma’lum qildi. «Negativ» material uchun rag‘batlantirish ishlari 15 fevraldan boshlanib, har hafta amalga oshirilishi aytildi. Mablag‘lar ishida kamchilikka yo‘l qo‘ygan davlat xizmatchilari oyligidan tushgan jarimalar hisobiga to‘lanadi.
Koronavirusning kunlik holati 1000 tadan kamaydi
Koronavirus yuqtirib olganlarning kunlik soni 22 yanvar maksimal (1478 ta) darajaga yetgandan beri ilk bor — 1000 tadan kamayib, 926 tani tashkil qildi. Eng yuqori ko‘rsatkich qayd etilgan hudud Toshkentligicha qolmoqda — 431 ta. Kovid asoratlari oqibatida 4 nafar bemor vafot etdi. Qolaversa, 188 kishida pnevmoniya aniqlandi.
Turizm va sport vaziriga ikki o‘rinbosar tayinlandi
Shaxrillo Maxmudov va Abdullo Aslonov turizm va sport vazirining o‘rinbosarlari etib tayinlandi. Hozirga qadar vazir o‘rinbosarlari bo‘lgan O‘tkir Saidov va Avazjon Karimov esa lavozimdan ozod etildi.
Manba: UzAuto Motors blekaut va olib sotarlar tufayli shartnoma berishni qayta tiklay olmaydi
UzAuto Motors kompaniyasi blekaut oqibatida komponentlarni ishlab chiqaruvchi korxonalar ishida yuz bergan uzilishlar, shuningdek, olib sotarlar sonining ko‘payib ketgani bois Nexia, Spark, Cobalt va Lacetti avtomobillari uchun arizalar qabul qilishni qayta tiklay olmadi. Dekabrda to‘xtatilgan shartnomalarni qabul qilish jarayoni 1 fevraldan qayta tiklanishi rejalashtirilgan edi.
Eng ko‘p o‘qilgan xabarlar | So‘nggi yangiliklar
- O‘zbekistonda chorva hayvonlarini identifikatsiya qilish rejalashtirilmoqda
- Paxta sotib olish bo‘yicha shartnoma shartlari fermerlar zarariga qayta ko‘rib chiqilishi mumkin. Tafsilotlar
- Futzal JCH: O‘zbekiston Paragvayga yirik hisobda mag‘lub bo‘ldi
- Germaniyaning Deutsche Bahn kompaniyasi o‘zbekistonliklarni ishga jalb qila boshlaydi
Qo‘shimcha imkoniyatlarga ega bulish uchun saytda ro‘yxatdan o‘ting