10 iyun kuni O‘zbekistonda sodir bo‘lgan eng muhim xabarlar dayjesti
Bektemir tumanida ajratilgan drift uchun trassa, qurilish vaziriga tayinlangan yangi o‘rinbosar, yoshlar uchun joriy etilgan subsidiyalar, quyosh va shamol elektr uskunalarini o‘rnatganlarga to‘lanadigan 15 mln so‘mgacha kompensatsiya va boshqala — «Gazeta.uz» ning 10 iyundagi xabarlar dayjestida.
Prezident BAA hukumat ishlari bo‘yicha vazirini qabul qildi
Prezident Shavkat Mirziyoyev BAA hukumat ishlari bo‘yicha vaziri Muhammad bin Abdulloh al-Gargaviy boshchiligidagi delegatsiyani qabul qildi. Vazir BAA hukumati Yangi O‘zbekistonda amalga oshirilayotgan islohotlarning samarali ro‘yobga chiqarilishida zarur ko‘makni ko‘rsatishga tayyorligini ta’kidladi.
Besh oyda o‘tgan yilning shu davriga nisbatan 6373 ta kam nikoh qayd etildi
Yanvar-may oylarida O‘zbekistonda jami 90 543 ta nikoh holatlari qayd etildi. Bu o‘tgan yilning mos davriga nisbatan 6 373 taga kam.
Pochta aloqasi sohasidagi qonunchilikka “posilka”, “pochta kuryeri” kabi tushunchalar kiritildi
Prezident tomonidan “Pochta aloqasi to‘g‘risida"gi qonun imzolandi. Ushbu hujjat bilan qonunchilikka “posilka”, “pochta kuryeri” kabi tushunchalar kiritildi.
Xotiniga najosat yedirgan erkakning jazo muddati yengiliga o‘zgartirildi
Salkam ikki yil oldin Toshkentda erkak kishi turmush o‘rtog‘ini kaltaklab, unga farzandining najosatini zo‘rlab yedirgan edi. 3 yilga qamalgan shaxs jazo muddatini yengiliga almashtirishni so‘rab sudga murojaat qildi. Sud qarori bilan uning o‘talmay qolgan 2 yildan ortiq jazo muddati yengiliga o‘zgartirildi.
Xorijiy tilni o‘rganish, davolanish, ijara kompensatsiyasi, moddiy yordam — yoshlar uchun subsidiyalar joriy etildi
Hukumat qaroriga ko‘ra, «Yoshlar daftari»dagi va moddiy ahvoli og‘ir yoshlarga 1 mln 200 ming so‘m miqdorida bir martalik moddiy yordam beriladi. Yangi yosh oilalarga uy qurish uchun garovsiz kredit, ijara kompensatsiyasi, davolanish va til o‘rganish uchun moddiy yordam — yoshlar uchun qator subsidiyalar joriy qilindi.
May oyida pul o‘tkazmalari rekordi yangilandi. Sabablar
May oyida mehnat muhojirlari O‘zbekistonga rekord darajada 1,65 mlrd dollar jo‘natgan, bu o‘tgan yilgi ko‘rsatkichdan deyarli 2,7 baravarga ko‘p. Bu Rossiyada ishlaydigan Qirg‘iziston va Tojikiston fuqarolari pul o‘tkazmalari, qolaversa, tovarlarni qayta sotish bo‘yicha amaliyotlar bilan ham bog‘liq bo‘lishi mumkin.
«Vazirlik va idoralar binolarini muqobil energiyaga o‘tkazish vaqti keldi» — prezident
Shavkat Mirziyoyevning fikricha, vazirlik va idora, hokimlik, mahalla binolarini ham muqobil energiyaga o‘tkazish vaqti keldi. Qolaversa, Navoiyda «Yangi O‘zbekiston» massividagi ko‘p qavatli uylar hamda Mendeleyev universiteti tajribasi asosida barcha OTMlarda quyosh panellari o‘rnatiladi.
Vazirlar Mahkamasi yoshlar bilan ishlashning ikki yillik dasturini tasdiqladi
Hukumatning 2022−2023 yillarga mo‘ljallangan yoshlar siyosati dasturi ijtimoiy qo‘llab-quvvatlash, konsultatsiyalar, treninglar, musobaqalar, marafonlar va boshqalarni nazarda tutadi. «Yoshlarning bo‘sh vaqti — yetakchining ish vaqti» tamoyili asosida uyushmagan yoshlar bilan ishlash rejalashtirilmoqda.
2023 yildan tashkilotlardan 25% issiq suv va tashqi yoritishni muqobil energiya hisobidan qoplash talab etiladi
2023 yildan savdo majmualari, madaniyat va istirohat bog‘lari, restoran, mehmonxona, supermarket, bozor, aeroport, temir yo‘l va avtobus vokzallari, xususiy ta’lim va tibbiyot tashkilotlari, banklardan kamida 25% issiq suv iste’moli va tashqi yoritishni muqobil energiya hisobidan qoplash talab etiladi.
Jalol Arashov qurilish vaziriga o‘rinbosar bo‘ldi
Toshkent shahar qurilish bosh boshqarmasi rahbari Jalol Arashov qurilish vaziri o‘rinbosari lavozimiga tayinlandi.
Quyosh va shamol elektr uskunalarini o‘rnatganlarga 15 mln so‘mgacha kompensatsiya to‘lanadi
Prezident muqobil energiya uskunasini o‘rnatgan aholi va tadbirkorlarni qo‘llab-quvvatlash bo‘yicha mutlaqo yangi tizim joriy etilishini ma’lum qildi. Unga ko‘ra, quyosh va shamol elektr uskunalarini o‘rnatganlarga 15 mln so‘mgacha kompensatsiya to‘lanadi yoki 3 yilga foizsiz muddatli to‘lov imkoniyati yaratiladi.
5 yil ish stajiga ega xotin-qizlar tavsiyanoma asosida o‘qishga qabul qilinadi
Hukumat qarori bilan kollej yoki texnikum diplomidagi mutaxassisligi bo‘yicha 5 yil ish stajiga ega xotin-qizlar kontrakt asosida OTMga qabul qilinadi. Bunda tavsiyanomaga ega abituriyentlar orasida alohida test o‘tkaziladi, ular orasidan yuqori ball to‘plagan 500 nafarigina OTMga kira oladi.
Toshkentda ikki nafar ichki ishlar xodimi yoshlarni kaltaklagani aytilmoqda
Toshkent shahrida ikki nafar yoshlar ichki ishlar xodimlari tomonidan kaltaklangani aytilmoqda. Bosh prokuratura holat yuzasidan tergovga qadar tekshiruv o‘tkazilayotganini ma’lum qildi.
«Hech xayolimizga kelmagan taklif». Akmal Saidov davlat va jamiyat bir-birini tiyib turishi haqida
Konstitutsiyada davlat va jamiyat o‘zaro bir-birini tiyib turishini yanada mustahkamlash taklifi bildirildi. Senator Narimon Umarov buni «fuqarolik jamiyatini shakllantirishda muhim omil» deb atagan bo‘lsa, Konstitutsiyaviy komissiya raisi Akmal Saidov «hech xayolimizga kelmagan taklif» deya ta’kidladi.
Shu vaqtgacha O‘zbekistonning 292,6 ming gektar maydonida chigirtkalar tarqalgan
O‘simliklar karantini va himoyasi agentligi shu kungacha O‘zbekistonning 292,6 ming gektar maydonda chigirtkalar tarqalganini aniqladi. Mamlakatning deyarli barcha hududlarida 284 ming gektarlik maydonda kimyoviy ishlovlar o‘tkazilgan.
Dam olish kunlari harorat pasayadi, yomg‘ir yog‘ishi mumkin
Shanba kuni O‘zbekistonga Kavkaz hududlaridan biroz nam va nisbatan salqin havo kirib keladi. Dushanbagacha ayrim viloyatlarda yomg‘ir yog‘ishi ehtimoli bor. Kunduzi havo harorati asta-sekin pasayib, +31…+33 darajagacha tushadi.
Namangan davlat chet tillari instituti tashkil etildi
Namangan viloyatida Ishoqxon Ibrat nomidagi davlat chet tillari institutini tashkil etildi. O‘quv jarayonlari sentabrdan boshlanadi.
Toshkent viloyatida haydovchilar uchun Yagona imtihon markazi ochildi
Toshkent viloyatida haydovchilar uchun Yagona imtihon markazi ochildi. Hududning haydovchilik guvohnomasini olish bo‘yicha imtihonlari endi faqat shu yerda o‘tkaziladi. Birinchilardan bo‘lib viloyat rahbari Zoyir Mirzayev imtihon topshirdi.
O‘zbekiston davlat konservatoriyasi oldidagi ko‘cha vaqtincha yopiladi
Juma kuni «Open-air» konserti o‘tkazilishi munosabati bilan O‘zbekiston davlat konservatoriyasi oldidan o‘tuvchi ko‘cha transport harakati uchun soat 18:30 dan 23:00 gacha yopiladi.
Qo‘shimcha imkoniyatlarga ega bulish uchun saytda ro‘yxatdan o‘ting